Tədqiqat işində müstəqillik qazanıldıqdan sonra Qazaxıstan və Azərbaycan arasında formalaşan ikitərəfli münasibətlərin tarixi inkişafı, geoiqtisadi əsasları və strateji tərəfdaşlıq perspektivləri kompleks şəkildə təhlil olunmuşdur. Məqalədə 1991–2022-ci illəri əhatə edən dövrdə Bakı və Astana arasında siyasi dialoqun inkişaf mərhələləri, hüquqi-normativ bazanın qurulması və beynəlxalq təşkilatlar, xüsusilə Türk Dövlətləri Təşkilatı çərçivəsində çoxtərəfli əməkdaşlıq məsələləri araşdırılmışdır. İşdə regional nəqliyyat-logistika şəbəkələrinin, o cümlədən Trans-Xəzər Beynəlxalq Nəqliyyat Marşrutunun (Orta Dəhliz) və gələcək Zəngəzur dəhlizinin Avrasiya geosiyasətindəki rolu Qazaxıstanın strateji maraqları müstəvisində qiymətləndirilmişdir. Eyni zamanda, karbohidrogen resurslarının Bakı-Tbilisi-Ceyhan boru kəməri vasitəsilə tranziti, yaşıl enerji layihələri və mədəni-humanitar diplomatiyanın hər iki dövlətin Qərblə inteqrasiyasındakı mühüm rolu elmi cəhətdən əsaslandırılmışdır. Yekunda iki ölkə arasındakı müttəfiqlik münasibətlərinin regional sabitliyin təmin olunmasındakı geostrateji əhəmiyyətinə dair elmi ümumiləşdirmələr aparılmışdır.
Cite this article
ƏSMƏR VÜQAR QIZI ŞÜKÜRLÜ MƏRKƏZİ ASİYANIN QƏRBLƏ İNTEQRASİYASINDA QAZAXISTAN – AZƏRBAYCAN MÜNASİBƏTLƏRİNİN YERİ (1991-2022). https://doi.org/10.30546/25194011.2026.201.2.4.5056